EJJEW GĦANDI

 

Qari mill-Evanġelju skond San Mattew (Mt 11, 25-30)

F’dak iż-żmien Ġesù qabad u qal: “Infaħħrek, Missier, Sid is-sema u l-art, għax inti dawn il-ħwejjeġ ħbejthom lil min għandu l-għerf u d-dehen u wrejthom liċ-ċkejknin. Iva, Missier, għax lilek hekk għoġbok. Kollox kien mogħti lili minn Missieri, u ħadd ma jagħraf lill-Iben jekk mhux il-Missier, kif ħadd ma jagħraf lill-Missier jekk mhux l-Iben u dak li lilu l-Iben irid jgħarrafhulu.

Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-madmad tiegħi u tgħallmu minni, għaliex jiena ta’ qalb ħelwa u umli, u intom issibu l-mistrieħ għal ruħkom. Għax il-madmad tiegħi ħelu u t-toqol tiegħi ħafif”.

 Is-silta mill-Evanġelju ta’ San Mattew li għadna kemm qrajna hi qasira u hi maqsuma fi tnejn. Fl-ewwel biċċa nisimgħu lil Sidna Ġesù jfaħħar lil Missieru tas-Sema għaliex wera ħwejjeġ kbar lil nies ċkejknin, nies li dawk li jidhrilhom li huma għorrief ħafna jwarrbuhom għax jqisuhom ta’ bla valur. 

Ftit qabel Ġesù faħħar lil San Ġwann il-Battista li kien isum u jagħmel penitenza u l-għorrief tad-dinja kienu jgħidu  li ‘Għandu fih xitan’, u dwar Ġesù, Bin il-bniedem, kienu jgħidu li kien ‘bniedem wikkiel u sakranazz‘, għax kien ħabib tal-pubblikani u tal-midinbin u kien jiekol u jixrob magħhom, kien ifejqilhom il-morda u jgħallimhom. Din il-ħaġa ma kinetx issir biss fi żmien Ġesù, għadha ssir anke fi żmienna u forsi b’aktar ħruxija. Alla għadu jħares lejn iċ-ċokon ta’ dawk li huma l-qaddejja tiegħu u jagħmel ħwejjeġ kbar permezz tagħhom, għax hekk jogħġob lil Alla. Hu għalhekk li Ġesù sar bniedem bħalna u ma għażilx li jgħix u jitħabbeb ma min hu setgħani, iżda għażel li jgħolli liċ-ċkejknin, kif sewwa fakkritna l-Madonna fil-Magnificat. Nifirħu mela aħna wkoll flimkien ma’ Ġesù u nfaħħru lil Missieru u missierna li hu fis-smewwiet li jgħoddna bħala uliedu ċkejknin li għandna bżonnu.

Hu minħabba f’hekk li fit-tieni parti tal-evanġelju tal-lum Ġesù jistedinna bil-ħerqa kollha u jgħidilna: “Ejjew għandi, intom ilkoll li tinsabu mħabbtin u mtaqqlin, u jiena nserraħkom”. Jekk nistaqsu għaliex għandna mmorru għandu, hu stess iweġibna: “Għaliex jiena ta’ qalb ħelwa u umli, u intom tistgħu titgħallmu minni”.

Ġesù jgħidilna wkol: “Ħudu fuqkom il-madmad tiegħi u intom issibu l-mistrieħ għal ruħkom. Għax il-madmad tiegħi ħelu u t-toqol tiegħi ħafif”. Tiġina li nistaqsu: “Imma veru li l-madmad ta’ Ġesù hu ħafif?”. Hemm ħafna fostna li jistgħu jgħidu: “Il-ħajja mhi faċli xejn, speċjalment jekk nippruvaw ngħixu kif suppost u kif jitlobna Ġesù. Ma tantx hu ħafif dak li jitlob minna!” Allura Ġesù qed jingannana? Żgur li le!

X’qed igħidilna, mela? Hu semma l-madmad, kelma li aħna llum x’aktarx nifmuha biss bħala piż, oppressjoni. Fil-fatt, fl-imgħoddi madmad kien biċċa għodda li l-bdiewa kienu jużaw meta kienu jridu jaħartu xi biċċa art diffiċli. Kienu jużaw il-madmad biex ix-xogħol jinħadem maqsum bejn żewġ bhejjem, u hekk ma jkunx annimal wieħed li jġorr il-piż kollu.

Is-sabiħa hi li Ġesù jgħid li l-madmad hu tiegħu, mhux għaliex hu l-proprjetarju, imma għaliex jekk aħna naċċettaw dan il-madmad tiegħu, il-piż se jinqasam bejnietna t-tnejn; nofs il-piż u aktar se jkun qed iġorru Ġesù, magħna u għalina.

Tajjeb niftakru li meta Ġesù jgħidilna: “Ejjew għandi”, jgħidilna wkoll: “Itolbu kull ma tridu u jingħatalkom. Ma għamlilna ebda restrizzjoni fuq x’nistgħu nitolbu, jew ma nitolbux. L-unika ħaġa li żgur ma nistgħux nitolbuh hu dak li hu ħażin għalina jew għall-oħrajn, għax ma nistgħux nitolbu li Alla li jonqos minn dmiru ta’ missier u jidneb. Fit-tieġ ta’ Kana l-Madonna qalet lill-qaddejja: “Agħmlu kulma jgħidilkom ibni”. Kien naqashom l-inbid. Ġesù qal lil-qaddejja biex jimlew il-ġarar bl-ilma. Dawk imlewhom sax-xifer. Qalilhom biex iservu minn dawk il-ġarar. Allavolja kien jidher stramb dak li qalilhom jagħmlu, il-qaddejja obdew, u raw li l-ġarar kienu mimlija mbid tajjeb. Ġesù ta lil kull min kien fil-festa, l-aħjar imbid li qatt daqu. Hekk jagħmel Ġesù magħna jekk namgħlu dak li jgħidilna, anke jekk ħafna drabi ma nifhmuhx sewwa x’irid.

Mela, ejjew noħduhom bis-serjetà l-kliem ta’ Ġesù: “Ejjew għandi ... Itolbu u taqilgħu”, anke jekk kultant idum biex jismagħna, jew jekk ix-xitan jipprova jikkonvinċina li Ġesù ma jagħtix kas tagħna għax aħna midinbin. Le ejja ma nemmnuħx lix-xitan għax dak qarrieq u jrid ibegħedna minn Alla. Niftakru fil-kliem ta’ Ġesù: “Jien mhux lill-ġusti ġejt insejjaħ, iżda lill-midinbin għall-indiema" (Lq 3, 8). Għalhekk igħidilna: “Ejjew għandi ... tħallux min iqarraq bikom.”