INT ĦIELES TASSEW?

Kieku kelli nistaqsi jekk aħniex pajjiż ta’ nies ħielsa, żgur li tweġbuni: Da żgur li aħna nies ħielsa. Pajjiżna kiseb l-indipendenza u sar repubblika. lmma jekk nistaqsu b'aktar attenzjoni: Aħna li ngħixu fuq din l-art ħelwa veru li aħna nies ħielsa? It-tweġiba tista' tkun oħra.

Aħna nies ħielsa daqs kemm nagħarfu lil min se nħallu jmexxina. Jekk se nħallu l-għaqal imexxina, aħna ħielsa. Iżda jekk se nħallu l-pika tmexxina, aħna m'aħniex ħielsa. Jekk aħna se naħsbu b'rasna, aħna nies ħielsa. Jekk se naħsbu b’ras ħaddieħor, inħallu lil ħaddieħor jaħseb u aħna nibilgħu, aħna m’aħniex ħielsa, u forsi qatt ma nkunu.

Il-mistoqsija, jekk aħna aħniex tassew ħielsa hi mportanti ħafna. Forsi nista' nagħmilha taħt forma oħra: Lilek, min qed imexxik? Tgħidli: Jien ħieles ma jmexxini ħadd!

Żbaljat: Jekk int ħaj, xi ħadd qed imexxik. Kif kiteb San Pawl lir-Rumani: “Ma tafux li... ta’ min tobdu tkunu lsiera, kemm jekk dan ikun id-dnub, li jwassal għall-mewt, u kemm jekk tkun l-ubbidjenza li twassal għall-ġustifikazzjoni?" (Aqra Rum 6,15-23)

Jekk tmexxik il-kilba għall-flus, għall-affarijiet, għax dejjem trid, u jekk moħħok biex tilħaq, inti mintix ħieles. Jekk int maħkum mill-moda, drawwiet, użanzi u tradizzjonijiet, int mintix ħieles. Ma rridx inkompli l-lista ta’ 'dnubiet' li jneħħu l-libertà tal-bniedem.

Min-naħa l-oħra, jekk int marbut li tgħix bil-għaqal, ma tistax tagħmel li trid, iżda int bniedem ħieles.

Jekk l-imħabba lejn għajrek jew lejn pajjiżek tmexxik biex tagħmel ċerti għażliet li ma jħallukx tagħmel li trid, int bniedem ħieles.

Jekk fuqek hemm il-liġi ta’ Alla, li ma tħallikx tagħmel li trid, u int trid tobdi kemm tista’ l-liġi t'Alla, int bniedem ħieles.

Jekk isakkruk il-ħabs minħabba l-ideali għolja tiegħek … int bniedem ħieles, ferm aktar ħieles minn dawk li joħonquk!

Kemm għandhom idea ċkejkna tal-libertà dawk li jħossuhom ħielsa għax jistgħu jilbsu li jridu, jmorru fejn iridu, u ma jagħtu rendikont lil ħadd!

Kemm għandna idea ċkejkna tal-libertà meta ma nbaxxux rasna quddiem min għandu idea aħjar minn tagħna, quddiem min għandu viżjoni tajba aktar wiesa’ minn tagħna!

Ġesù baxxa rasu quddiem ir-rieda ta’ Missieru. Mhux biss kien bniedem ħieles imma kien ħellies ukoll. Jew aħjar: għadu ħieles u ħellies għal dawk kollha li jingħaqdu miegħu mhux biex jagħmlu li jridu, iżda biex jagħmlu dak li jrid minnhom il-Missier.

Meħud minn Il-Qanpiena fuljett maħruġ mill-Parroċċa ta' Santa Liena, B'kara, ħarġa Nru 239, Frar 2001, p.3